ភ្នំពេញ៖ ធនាគារជាតិនៃកម្ពុជាបានប្រកាសទទួលយកប្រាក់រៀលចាស់ៗ ទក់ និងរហែក ពីពលរដ្ឋដោយប្តូរមកវិញនូវប្រាក់រៀលថ្មី ចាប់ពីថ្ងៃទី ២០-២៩ ខែមីនា ឆ្នាំ២០២៤ ដោយឥតគិតកម្រៃសេវា។ ការប្រកាសនេះធ្វើឡើងដើម្បីអបអរសាទរខួបលើកទី ៤៤ នៃការបោះផ្សាយក្រដាសប្រាក់រៀល(២០ មីនា ១៩៨០ - ២០ មីនា ២០២៤)។

ធនាគារជាតិនៃកម្ពុជា នឹងបង្កើតយុទ្ធនាការស្រលាញ់ប្រាក់រៀល ដោយសហការជាមួយគ្រឹះស្ថានធនាគារនិងហិរញ្ញវត្ថុទទួលប្រាក់បញ្ញើ តាមខេត្ត-ក្រុង ដោយទទួលប្តូរក្រដាស់ប្រាក់រៀលចាស់ ទក់ រហែក និងជំនួសវិញនូវក្រដាសប្រាក់ថ្មីគ្រប់ប្រភេទជូនសាធារណជននៅគ្រប់សាខាធនាគារជាតិនៃកម្ពុជា និងគ្រប់សាខាគ្រឹះស្ថាន និងហិរញ្ញវត្ថុរាជធានីខេត្ត។

នៅថ្ងៃពុធ ទី២០ ខែមីនា ឆ្នាំ២០២៤ ធនាគារជាតិនៃកម្ពុជា នឹងរៀបចំសិក្ខាសាលាស្តីពី «ខួបលើកទី៤៤ នៃការដាក់ឱ្យចរាចរប្រាក់រៀលឡើងវិញ៖ ដំណើរឆ្ពោះទៅមុខនៃប្រាក់រៀល និងប្រព័ន្ធបាគង»នៅថ្ងៃទី២០ ខែមីនា ឆ្នាំ២០២៤ នៅមណ្ឌលសិក្សាបច្ចេកទេសធនាគារ រាជធានីភ្នំពេញ។

ធនាគារជាតិបានអំពាវនាវពលរដ្ឋចូលរួមចំណែកប្រើប្រាស់ប្រាក់រៀលឱ្យកាន់តែទូលំទូលាយ ដើម្បីជាប្រយោជន៍ដល់សេដ្ឋកិច្ច និងសង្គមជាតិ។

គូសបញ្ជាក់ថា ក្រៅពីថ្ងៃនៃយុទ្ធនាការស្រឡាញ់ប្រាក់រៀល សាធារណជនក៏អាចយកក្រដាសប្រាក់រៀលចាស់ ទក់ ឬ រហែក មកប្តូរនៅតាមបញ្ជរបេឡារបស់សាខាធនាគារជាតិនៃកម្ពុជារាជធានី-ខេត្ត (លើកលែងតែស្នាក់ការកណ្ដាល)៕